Hnam changkang leh hnam fing ho hawrawp awmzia hi a rilin a thuk kan ti thin. Dik pawh a dik reng a, hawrawp pakhat hian awmzia leh kawh tum tam tak a neihna hian a ti ril niin ka hria. Keini hnam erawh hmelma hlauh vang nge ka hre lo, kan pipu te khan tlangah awm hmun an khuar thin. Phai zawla naum sa taka awm theih ni si tlang chhengchhe kara an awm tlat kha an fin loh vang te pawh a ni mai thei. History kan en chuan phai zawla cheng te tan ral a tama hnam tenau tan chuan mi tlawhpawh vak loh tlanga awm kha a ralmuang zawk mah ang. Tlanga awm ta chu tlangmi tih kan ni. Mipa nupui la nei lo pawh ‘tlangval’ tia koh an ni. Tlang leh Val hian awmze hran an nei ve leh a, hei hian Mizo hnam hawrawp lo ril ruk zia a ti lang chiang hle awm e. Tlangval in a kawh tum nia lang chu tlanga cheng/awm ‘val’ a nih a rinawm. ‘Val’ kan tih chuan mipa la chak tha tak leh chhungkua la din lo a kawka tlangval kan tih chuan tlanga cheng val a kawk thung. Phaizawla kan awm hnu pawn ‘tlangval’ kan ti ta zel a ni. ‘Phaival’ kan ti lem lo.
Thingtlanga awm mihring te chu an changkang lo tlangpui a tih theih. An thlah kal zel te pawh an fing em em lo. Tun hnuah phai lamah an pem nasa a, tlang loa eizawng thin tan erawh harsatna an tawk thin. YanNwe pawh hi tlangram atanga pem khawm ho din khua a ni a, tlang lo an neihna hmun pawh a hla tawh hle. Chu thingtlang khuaah chuan thingtlang tlangval ve mai hian Isua krista chanchin puangin ka awm a. Thingtlang tlangval hian an tan thil ropui tak tih tumin ka bei ve thin. Ka thiamna sawrkhawmin an nunkawng tha taka an hman dan tur leh ei bar zawnna kawnga hma an sawn theih nan an fate nunah chi ka lo tuh ve a ni.
Thingtlanga cheng thin thlah kal zel ‘Val’ hian he thintlang khua tan hian eng ang thil ropui nge ka tih theih dawn ka hre lo. LalPa i hmangaih fate tan hian eng emaw tak min tih tir rawh aw.
VIM (Volunteer In Mission) member te hi tute nge an nih?
He zawhna hi chhan a awl hmel viau nan kan chhang sual ang tih chu hlauhawm tak a ni thung. A chhan chu ‘volunteer missionary’ pawl an nih vang a ni. Tuna rawn kal ho chauh hi an nih hmel lohva an ni hi chu an thiamna a taka rawn hlan an ni a. An hnung lamah hming hriat loh tam tak an awm thung. Chutiang a nih si chuan a taka rawn kal te hi i han belchiang chhin teh ang. Members tam tak zinga a tha filawr chin an ni tih an chet dan leh tawng kamah a hriat a, kan beisei ai nasa-in rawng an bawl a ni. An tumah an chian mai bakah an theihtawp aia nasa-in rawng an bawl bawk. An background chu hrechiang lo mah i la, Kristian chhungkaw tha tak atanga rawn zi chhuak an ni tih a hriat a. Khawpuia cheng mah ni se midang hmuh sitna leh ngaihnep zia an nunah a lang lo hi an hlawhtlinna chhan tur lian ber niin ka hria.
Ka hriat theih chhinah ‘Sayamah Tluangi’ (Nl. Lalrintluangi) hi ‘ran doctor’ niin US company lian Yangon-a awm company-ah hna lian tak chelh mek a ni a, a ni hi Naga Mission Field missionary hmasa ber ‘Rev. Dr. Vanlalhnema’ fanu zinga naupang ber a ni nghe nghe. CWM buatsaih Training In Mission (TIM) Program ah kum 2016 khan a kal tawh.
(Subject- Mental Health)
‘Sayamah Manuni’ (Nl. Vanlalnunzami) erawh ‘Freelance’ rawngbawlna zinga hruaitu niin Bible school degree nei a ni. Kum 21 a nih atang rawngbawlna ah a zuang lut a, hun puma rawngbawl chu ni lo mah se hmun hrang hrang tlawh kualin naupang ho zingah a thawk ber thin. (Subject – The Value of Human)
‘Sayamah Zawmi’ (Nl. Vanlalzawmi) hi Upa Lallunghnema fanu a ni a, an ni chhung hi mission field tana thawk hlawk em em chhungkua an ni a. CWM buatsaih Training In Mission (TIM) ah kum 2017 khan a kal tawh bawk. ‘Climate change’ tih Pathian thilsiam enkawl hlutna lam hi a subject niin ka hria.
‘Sayamah Zoi’ (Nl. Zohmingthangi) hi chu a chanchin ka hre tam lo nan puan thui thiam tak a ni tih chu ka hria. KhamTi tukverh puanzarna pawh a thui sak. Mizoram lamah hun rei tawh tak lo khawsa tawh a nih avangin mizo lam leh tawng a thiam tha hle.
(Subject – Youth & Sex)
Mipa lam ve thung hi han belchiang leh ta i la, ‘Saya hlima’ (Tv. Lalnunhlima) hi chu producer niin VIM activities hrang hrang record tu ber a ni. Music lam a tui mai bakah zai pawh a thiam tha hle. A ni pawh hi ‘Rev. Dr. Vanlalhnema’ fapa a ni a, Mizo zinga ‘SKY net’-a producer hmasa ber a nih hial ka ring.
‘Saya Sawma’ (Tv. Malsawmsanga) erawh mi tawng tlem leh nun zawiawi tak mai, mi pawi sawi hlau em em a ni a. Kum lamah kei ai naupang mah se music lamah chuan ka tluk lo chiang khawp mai. Keyboard leh Guitar duh ang thala a thiamna mission field tana a hlan hi a ropui a ni. Naga pa leh Mizo nu atanga rawn piang ‘Naga-Mizo’ tlangvalin ‘Naga Mission field’ ah a rawn tel hi Pathian rem ruat a ni ngei ang.
Kan sawi hmaih hauh lo tur a la awm a, VIM a pian nana hma la tu leh founder Rev. Gospel Tana hi a ni. A ni chanchin hi chu a hranpa ngata ziah tham a tling. A mission kal pui dan pawh part dangah chipchiar zawkin kan la thlir ho dawn nia.
A tir lama kan sawi ang khan an chanchin kimchang ka hre lo kan tih tawh kha, ka hriatchhun atang ringawt pawh khian mi naran ni lo, van tlang chunga leng thiau an ni tih chu a chiang mai awm e. An hun awl neih an chhung leh thenrual te nen hlim taka hmang lova ‘Naga’ tan an rawn hlan hi a hlu a. Pathian pawn mal a sawm ngei ang. Ni lo, a sawm mai ni lovin a vur hian a vur dawn chiang. VIM members te hi tute an ni tih zawhna chhanna chu hei hi a ni, ‘Pathian mi hriat thalai’ an ni tih hi.
Temporary Temple (3)
Thla a ral leh dawn ta reng mai, hun hi kan um nge min um tih hi ka la thliar hrang thiam chiah lo. Thliar hrang thiam pawh ni la a sawtna em em a awm loh avangin ka ngaihtuah chhunzawm duh ta lo a ni. Chu aia pawimawh PCM YanNwe Biak In chanchin kha kan thailang zawk ang e. October 24-25-a sak tum October 28-a kan sawn tak chu vawiin khan kan zo fel thei ta a. Pathian khawngaihna avang leh members ho in pekna vang liau liau a ni. Kohhran Secretary U SaLitThaung-a pawh a rawn tel thei a, kei erawh sawrkar school lamah ka kal thung. Ka tel lova an sa duh leh phunnawina engmah an nei lo hi ka lawm hle. A chhan chu anmahni ke-a an din theih ka duh vang a ni. Midang rinchhana kal zawng an awm loh hunah a buaithlak thei emai. Zin san pawh ni i la, inkhawm boruakah lungngaihna tur a awm lo. Anmahniin engkim an kaihhruai thiam bakah sermon an ti thei deuh vek bawk.
Hnathawh lamah lah an taima em em bawk nen an takmak vang a nia biak in pawh sak zawh a nih ni. U ChhiSeMu leh an nu, U SatLiThaung leh Daw ChakChakShi ten a chung an chih a ni. School kal hma nau ka lo awm sak ve kha.Naktuk hian tawngtaina hmangin bul kan tan ang. Lawmthu sawina leh chawnghei tawngtai kan kawp dawn a ni.
Zan in inkhawm zet chu!
Kan hnung kar October 23 atang khan Sunday zan inkhawm bul kan tana zan in hi a zanhnihna a ni. Chawlhni a nih angin an hman em em ringawt mai. Chuvanga zan lam inkhawm rawt kan ni. A lo tih chi phian leh nghal a, a chhan chu thenawm khawveng te pawn an rawn chhim theih phah mai bakah kohhran danga rawngbawltute sawmna hun remchang a ni. Kohhran members te tan pawh chanvo neih nan a tha hrim hrim bawk.
Zan in zet zawng thinrim leh nuihna hun a ni a tih theih hial ang. Chhangchhe kohhran kan nihna a lang chiang a ni. Kohhran chanvo nei te pawh experience la nei em em lo an ni leh zela kawng lehlama ngaihtuah chuan a hlimawm tho mai. Zai lai laiin an tawng leh lawng lawng thin hi chu sim se ka duh. Han hau turin kei aia upa an lo ni nen a tih chi tehchiam lo. Naupang ho mawlh hi nia, Lal Isuan hnar a phal si lo hi a buaithlak ve deuh kan ti teh ang. Inkhawm laia lo harh, chhuata lo mu, khawih tura zawnga vak,etc.. kan ni nuk a, nu leh pa ten an control hneh lo deuh chu a ni. Inkhawm boruak ti buai khawpa an harh erawh a tha chiah lo.
Chairperson pawh a fanu naupang zawkin a zar buai reng bakah inkhawm lai laiin an awi leh lawp lawp a. Chair e ti lo chuan a duh duhna hmunah a kal kual thul, sermon tu ding lai ten midang a va be leh thut thin, khua hi a var lo a sin. Naupang lam bawk kha han tuihnih leh ta i la, naupang tel lova inkhawm a rem lo hi harsatna chu a ni. Mahni fate kalsana inkhawm chu thil theih loh a ni hrim hrim nan inkhawm laia control lamah erawh an hniam thung.
YanNwe PCM dinhmun chu a hriat maia mifing leh kohhran kalhmang pawh hre lem lo kan ni deuh veka mahni rem hriat dan danin ke kan pen rih a ni ber. Mahse hnatlan nan an tha an ui loh mai bakah chanvo kan pek an hlen zat zat bawk. Tling lohna tete chu nei hlawm mah se testimony an nei ropui hlawm hle. Daw Chak Chak Shi hi sumdawng mi a nih laiin dawi thiam ten an dawia a kawchhungah rul an dah sak a. Chu chuan a thina thisen a lo dawt thin a ni. Mahse Pathian tihdamna a chang a, a pasal pawh kristianah a in pek phah ta a ni. U Chi sit Mu pawh a pa hi hman lai dawi thiam, ramhuai ho bula in thawi thin a ni a, saramerih tlang huai be tu a ni. Tuna an nu nen hian pawm lai nei ve ve chungin an in nei a, an sualna puan an hreh loh mai bakah nun thara nun zir mek an ni bawk. PCM YanNwe-a a phusa ber leh zai tui em em nupa an ni.
U Zu Thaunga pawh hi India lam atang a U nupuiin a tihduhdah em avanga burma lama rawn tlan a ni a. A tih tawh chu ti bur duh lohnaah chuan ngeng em em a ni. Mahse a luhlulna a hmang tangkai hlauh va Pathian leh a kohhran tan mi in pe tak a ni tawh. Kohhran huan pawh amah chauhin a sam fai nghe nghe. Thahnem ngai mi niin tunah hian YanNwe PCM kohhran treasure a chelh mek. Kan han tarlan duh tak chu kan member te hi mi tling lo te te mah ni i la, testimony an nei ropuia Pathian leh a kohhran tan a nih tawh chuan mi in pe tak tak an ni vek tih hi sawi lan loh atan chuan ka ui a ni.
An fa rual keimah hi min zah der thiam em em hi a ruka an puitling zia ti langtu zinga langsar ber pawl a ni ngei ang.
Temporary Temple (2)
A tum khatna ai inbuatsaihna a thain a rintlak zawk bawk a. Hna a sawt zual bik a ni. A chhan chu zan lamah ar an puah sa a, chaw erawh mahni chaw chhum fum a ni. A ruala hmun khata tih nghal tawp chu harsatna a tama hna a sawt thei bawk lo. Chaw an lo fun takah chuan thing a sepa eirawng bawltu hranpa awm a tul loh avangin kutkhawih a rual a ni. Keipawh huan lamah ka thawk rei thei ve ta. Ni hmasaah kha chuan eirawngbawl a tul vangin ka tel fumfe hman ta lo a ni.
Biak in hi feet ( ) niin mau hmanga duan a ni. Thing pawh tlem a tel. Perek hmang lova sak a ni bawk. Mistiri members kan nei chu vanneihna a ni ringawt mai. Engkim a man a buaipui thei nghal vek a, chuvanga sa thei chu kan ni. Kan zawh chak em em na chhan chu mahni ta anga an en vang leh Pathian tan a ni tih an rilruin a hriatchian em vang niin ka hria. U Zu Thaung-a phei chu kan hnatlan hma deuh khan amahin huan a lo sam tawh bawk.
Naupang ho school chawlh a lo ni a, ka inah an awm khawm. Gideon-a’n hmeichhe lam a puih mai bakah biak in cleaning a lo ti ve bawk.
Temporary Temple (1)
Davida khan Pathian chenna in tur sak kha a duh nan zawlnei nathana hmangin phal sak a nih loh thu ‘1 Chronicle’ ah kan hmu a. Indo mi leh thisen chhuah mi a nih vanga rem ti lo a ni. Lei leh van siamtu hi Pathian khirh leh duhtui viang angin Bible hian tarlang mah se misual leh mi tling lo te erawh a hmangaih lawi si a. Lal ropui leh amah ring em em tu, in ngaitlawm leh tawngtai mi erawh a chenna in tur sak a phal lo hi a mak dangdai ve khawp mai. Indo mi leh thisen chhuah mi a nihna chhan pawh Pathian vang tho a ni. Pathian remruat dan hi kan hriatthiam phak bak a nih avangin amaha in nghah tawp hi a hahdam a nih hi.
YanNwe PCM members te hi indo mi leh thisen chhuah mi chu ni hlawm lo mah i la mihring lama teh chaun Lal Davida hi kan tluk lo nasa tih chu ka chiang. Mahse vawiin (October 28) khan amah kan biakna tur in kan sa tana Biak In Puitling chu a ni lo, mau hmanga sak a ni. Ka chenna ina inkhawm thin kan ni a, mihring chenna in anih avangin harsatna a tam a ni. A hranpa taka Pathian kan biakna tur in sak chu kan rilruah a lian a, October 25,26-a hnatlanga sak tura kan rel chu ruah surin min dang ta kha a nia. October 27 zan khan Committee hmasa ber kan thu a, October 28,29-a thawk turin kan rel thlu ta a ni. Members te an phura kan in lungrualna vang pawh a ni ang hlim tlang takin kan thawk thei ta a ni.
Sum chungchangah harsatna lian tak kan tawk nghal a, June thla atanga inkhawmna thawhlawm tling khawm leh sawma pakhat ho chauh chu kan sum neihchhun ani. Mahse Pathian hnathawh ropui a lanna tichiang em em tu chu mahni kutkhawih ngei sum sen tam ai mihring tha seng tam duhna rilru members ten an nei hi a ni. PWS members pali ten ram hla taka mi coconut hnah nena in ang tak ‘Yáung’ an tih chu ke ngatin an va sat a, kohhran secretary leh treasure ten huan tih fai leh a chung khuh mai thei turin mau hmangin tan an lo khawh ve a ni. Management an zir lo nan manage dan ewrah an thiam hle thung. An fa rual mah ni i la kan thusawi te min ngaihthlak sak mai bakah min rawn hmasa lova thil an ti lo hi an puitlin zia a ti lang a ni. Bialtu Pastor Rev Chi Le Maunga in hrilh hriatsa awm lo mah se YanNwe a rawn kal kha Pathian remruat ka ti lo thei lo. A ni’n malsawm tawngtaina min neihsak nghal bawk a ni.
Thil ti thei leh mi ropui ni hlawm lo mah i la, Pathianin amah kan biakna tur in sak min phal hi kan lawm a. Kan in pekna beitham mah se rimtuia min pawm sak hi phuloh malsawmna ka ti lo thei lo. Ni e, Pathian chenna in tur leh tawngtaina hmun tur chu keini PCM YanNwe ten vawiin khan bul kan tan ngei a lawm.
YanNwe-ah Zirtirtu
YanNwe hi khawthleng sei leh zau, Naga mahni ram in awp theihna hmuna khaw zau ber leh phai zawl sei ber a ni hial ang. In 250-300 vel awmna khua niin khaw hran hran atanga rawn pem ho din khua a ni. Naga ho hi ram tha zawnga pem kual an la tama in kal pawh harsat luat vang leh tlang lo siam rem tawh loh avanga pem kual an ni tlang pui. He khua mihring pun chak em em na chhan pakhat leh chu khawpui(myo) ni tura rel thluk a nih vang a ni. Khawpui a nih hunah naga rama airport hmasa ber din ani anga damdawi in leh sawrkar office Pawimawh dang pawh dah belh ani ang. Zirna school pawh tun ai a changtlung zual dawn a, chutiang hamthatna hrang hrang chu hmuh beiseia rawn pem an ni. Mahse sawrkar inrelbawlna lam a buai tak avangin beisei angin thil a kal ta lo mai mai. Tlang lo siam an nih deuh thum avangin an tlang lo pawh a hla vawng vawng hlawm hle a ni.
Sawrkar a chiankuang tak lohah chuan Zirtirtu in diah lohna a nasa zela naupang ho an khawngaih thlak khawp mai. Kan tuition students te erawh theih tawp chhuahin kan zirtir thina mahse a tam zawk hian zirna tha an hmu meuh lo. Zirtirtu hna dil ka tlin loh te rilruah a rawn langa naupang zirtir hi ka hobby zinga mi a lo ni nen volunteer teacher hna chu July 26, 2022 khan ka thawh tana. Pathian khawngaihna a zarah tun thleng ka la thawk chhunzawm zel a ni. Zirtirtu hmun dang atanga rawn kal ho an CDM tak avanga in daih lo an ni. A-Thet-Dan-Piah ah sayamah Julius leh Aye-Daw chauh an awm a. Grade-10 ah English leh Geography subject ka vuan a ni. Zing dar 10:30 atang 12:15 thleng ka zirtir thin. Julius-i a in sawn leh tak siah chuan Grade 11 lamah English leh Economic subject min pek belh leh a, tun thlengin subject 4 ka la ta a ni.
Zing leh tlai mahni sum sengin ka kal ve char chara hlawh erawh ka la lo. Pathian hmangaih fate zirtir theihna hun remchang ka nei hi ka lawm a, zirtirtu hna dil tling lo mah i la indirect zawngin Pathianin kawng min hawn sak zawk ta a ni. Grade-10 a students tam zawk hi Naga niin Makuri, Lungpuri, Khinmiungan, para an ni. Kawl leh kuki te pawh an awm. Grade-11 lam erawh students 6 chauh an awma Kuki 3 leh naga 3 an ni. Chawhrualin kuki hi lehkha thiam thei an ni zela Naga lam erawh lehkha lam an ti thei vak lo. Mahse luhlul zual leh sual an awm lova thu an awih hlawm hle.
He school-a ka luh hma hian rilru lam a in sual nasa ve a, a chhan chu hmun hrang hrangah sawrkar dodal niin school hawng mah se naupang school kal tir loh kha an au aw a ni. Sipai sawrkar duh lohna lantir nan Zirtirtute an CDM a,nu leh pa ten naupang sawrkar school an kal tir duh lo bawk. Chutiang kara volunteer teacher lo thawh chu revolutionarist te an hmaizah awm a ni. Mahse hmun pui lamah he school-a ka thawh chungchang hi ka report tir lem lo. Naupang ho hmakhua ka dawn vanga thawk mai ka ni. Sawrkar tan vanga thawk ka ni lo va sipai sawrkar duh lo pawl zinga mi ka nih ve avangin anmahni tanpui anga lan ka duh lo. Tanpui pawh ka ni chuang lo, Pathian hmangaih fate ka lainat vang zawk a ni. Chubakah mahni ram inrelbawl thei an nih vangin Politic lamah an in hnamhnawih loh mai bakah tun thleng naga ramah PDF leh sipai in do thawm hriat tur a la awm lo bawk.
Missionary ka nih angin Politic ah ka in hnamhnawih lova Education mission hi ka hmanraw ken zinga pawimawh a nih avangin naupang ten zirna tha an hmuh theih nana thawh chu ka tih tur a ni. Chuvanga volunteer teacher thawk ka ni. Rawngbawlna mit atang chauhin thil kan thlira Pathian ram zauh hi kan tih tur zinga mi a ni bawk. Volunteer teacher ka thawh atang he khuaah hian ka tlangnel sawta min tibuaitute pawn min hmuh dan a dang tih ka chiang. Hmangaih taka an fate zirtirtu tihbuai thu a awm lo. Politic boruak te, kan ram dinhmun te thlir chungin hma kan la ve zela zirtirtu an mamawh em em laia mahni ina lo tawm reng chu ka thinlung hian a ngai ngam thlawt lova sawiselna an-ka ai Naga rama mi ten zirna tha an hmuh ka duhna hi ka dang thei ta lo ani ber e.
YanNwe PCM Kohhran Chanchin
March 20,2022 khan AungZiYah silver jubilee hman zawhah Rev. Hlaing Si Thaung-a nen YanNwe kan lut a. Kohhran in a la awm loh avangin U Tin Shwe-a in kan luah hawh a ni. A naktuk Silver Jubilee hmanga lo kal ‘Naga mission field’ rawngbawltute hawna tur kawnga awm kan nih avangin in thar hawnna leh rawngbawlna bul tan hlanna neih a ni a. Rev Aung Kyaw Moe’n thuchah tawi a sawi. Khami ni atang khan a remchang ang angin rawngbawlna ka nei tan nghal a ni. Education mission kha ka hmanraw pui ber a ni.
Pathian khawngaihna a zarah min thiktu leh dotu an pung tual tuala hnawhchhuah leh hnam sipai hmanga in vona hial kan tawng ta a ni. July 17,2022 chawlhni inkhawm banah ‘Nu-Chia-Yi’ thalai pa-5 ten indirect hmangin min rawn vo a, hei hi buaina lian kan neih hmasak ber tum a ni. He buaina hi karkhat chhung vel ngaihtuah a nih hnuah MaKuRi vengah kohhran dang phun phal a ni ta daih thung. He vengah hian AG kohhran an lut hmasa a, an Biak In sak pawh tihchhiat sak an nih mai bakah silai nena tin chunga vo an tawk bawk. A phusa ber ‘Ngei-Chhan-Yi’ hnam sipai lal a thih tawh avangin kan vannei ta a ni.
October 4,2022 khan kohhran in 2 an rawn lut a, he mi ni hi ‘PCM YanNwe’ din ni chu a ni. Field secretary Rev.Awm Choi’n lawmluhna a neih mai bakah Baptisma la chang lo te pawh a baptist nghal bawk. Chumi hnuah in-2 an rawn luh belh leh a. Tuna ka ziak mek lai hian members hming ziak zawng zawng hi 25 kan ni. Kohhran hmelhmang pawh tlem tlemin kan din chho ve zel a, Kohhran committee leh PWS unit pawh din nghal a ni. Kohhran kalhmang pawh an la hre hlawm lova a tlachawpin kan zirtir pah a, Baptism chungchangah pawh hnim kher duh pawl an ni hlawma. Mahse PCM kalhmang erawg an hnial ngam bik lem lo.
Kohhranin huan nei tawh mah i la, Biak in leh Quaters pawh kan la nei lova. Engkim a tir atanga bul tan kan nih avangin mamawh kan ngah hle. October 24,25 hi huan tihfai leh temporary biak in sak hnatlan tura rorel a ni nan bang lova van ruah surin min dang ta a ni. PCM YanNwe Kohhrana members te hi khawtlangin a ensan leh khawvel ngaiha sual lang sar titu an ni deuh vek hi a ropuina lai tak chu a niin ka hria. Mi tling lo leh mi rethei ten an din tihna a nih chu. Uirena suala tlu te, midang nupui chhuhsak te, kohhranin a hnawhchhuahte awm khawmna niin khawvel mite ngaih danah chuan meidila kal ngei turte kan ni. Mahse Lal Isua rawngbawlna ngun taka kan en chuan ‘Mi tha lam tura lo kal ni lovin mi sual te lam tura lo kal’ a nih thu amah ngeiin a sawi kha. Mahni tha leh fel in titen min rawn bel lova kohhran leh khawtlangin a ensan, mite kawm serh ho ten min rawn bel hi lawmawm ka ti.
Kan tawngtaina pakhat chu ‘PCM YanNwe’ hi endawng tawk mihring, thlarau lam dam lohna nei te tan in enkawl damna hmun ni turin kan dil a, kan dilna chu chhangin a awm ta a ni. Kohhran hi mifel ho tana din ni lovin misual ho tan zawka din a nih kha maw le….
(October 25,2022)
Makuri hnam leh inneihna
Hnam tin hian tih dan phung leh hnam dan, hnam dangin an neih loh thil mahni hnam bil tan chauha tangkai hi kan nei theuh va. Chu dan hmang chuan khawtlang kan enkawlin thu dik leh rorelna kenkawh thin a ni. Makuri hnam pawh hian dan danglam tak mai, naga hnam ho laka hrang hlak hi an nei a. Hnam tinin kan hmantawm dan ni lo anmahni bil dan chu vawiin thleng hian an la kengkawh a tih theih. Chu dan hmang chuan October 22 khan kan member zinga ‘Pi Ri Shan Shi’ thubuai ngaihtuah a ni.
Makuri hnamah hian chi peng hrang hrang an awm ve leh a: KaChha leh ShaungLin hi an sawi ka hriat ngun pawl a ni. Ka in luah neitute hi KaChha chi peng an ni a, PCM ah hian KaChha chi an tam an ti. Mipa makpa chhung khung kan tih mai, nupui man pe lova hmeichhe lama an lawi chuan an nupui hnamah an bet tihna a ni. KaChha pa khan ShuangLin hmeichhe inah a luh chuan ShaungLin pa a ni mai.
Chhiatni thatniah ShaungLin lamin an buaipui vek ang. An fate zawng zawng pawh ShaungLin chi ho ta a ni. Mizo hmeichhia ten an pasal te sakhua an vawn ang hi a ni ang chu. Mizo hnam danah chuan hmeichhia in sakhua a nei lo tih a ni mahse Makuri ah erawh chutiang a ni lo.
U Win Zaw-a hi Kachha chi ni mah se hmeichhe man pe lovin ShaungLin hmeichhia a neih avangin ShaungLin ta a ni a. A fate pawh shaunglin chi an ni. Mahse a nupuiin a uire san avangin ShaungLin nihna hlipa Kachha lama awm leh a duh avanga rerelna hmuna lut an ni. Naga ramah hian Sawrkar ni lo ‘Naga rorelna’ hi a hranpain a awm ve a. An thubuai neih hi hnam hruaititen an chingfel thin. Kan kohhran PCM thubuai pawh an hnam rorelnaa chinfel a ni nghe nghe.
WinZaw’n ShaungLin ka nihna ata ka bang tih vang ringawtin a nihna a hlip thei lo. Hmeichhe man a pek loh kha rulh phawt a tul a, a rulh theih loh chuan KaChha ani thei tawh lo. Chuvangin hmeichhe man an tuk ho kha a rulh vek hnuah chauh ShaungLin chi ata a zalen chauh ang. Nilenga an sawiho hnuah pawh thuthlukna an la siam thei lo a. January thla lamah thutlukna famkim an siam chauh dawn a ni. Hmeichhe lamin an phut an tih fel theih chuan Kachha a ni leh tawh ang.
An hnam dan hi chik taka en chuan hmeichhe tan hamthatna a tam a. Feminist Theology pawh an mamawh ve lem lo a tih theih. Engtin emaw tak hian an hnam hian a la phuar khawm hneh hle bawk. An pipute ata an hnam dan rochun pawh an la vawngnung tha hle. Hnam hmangaihna an lak nat mai bakah kei inti hnam an ni a, mahse an hnam hmangaih dan erawh in enfiah se ka duh khawp mai.
Nupa nun
Nidanga thleng ngai lo leh ka beisei loh thil mak danglam tak a thleng chu ka hawi hai hle. Tlangval nupui neih rilruk ve tan chauh tan chuan nupa kara buaina chinfel chu tih atan pawha mawi a ni lo. A taka tawn hriat lo nei tawh chu ni i la thuhran, mahse an buaina hi a thuk a ni. U Zu Thaunga kohhran treasure hian a nupui a sun tak avangin midang a nei a. Tuna a nupui nena an buaina chu a ni chinfel ngai chu.
Inkhawm tan a hun tawha lo kal ngei tura kan beisei ho hmel erawh hmuh tur an awm ta lo. Chumi zingah chuan nidanga tlai ngai lo ‘U Zu Thaunga’ te chhung pawh an tel a ni. Nizan khan a fate pawn ‘Sunday School’ an rawn zir a, mahse an rawn lang ta chuang lo. Chanvo a neih avangin ‘U Chhit Sit Mu’n a va ko ta ringawt. Minute tam kan nghah hnu chuan an rawn lang ta hram. An hmelah hlim hmel hmuh tur a awm lova lungngaihna hmel leh lungawi lo hmel tih loh chu a awm lo ni ber mai.
Inkhawm banah ‘U Chhit Si Mu’ nupa in an ina leng tura min rawn sawm avangin kan kal a. Nizan lam khan inthen hial tumin chhungkaw buaina an lo nei reng mai. Thikthu chhia te, ngaihdan in an loh te, U Zu Thaunga fanu te chungchangte a tam mai. Leh lam leh lam thusawi chu chiang takin kan ngaithla a. An buaina hi a namen lo tih chu a chiang ta. Hmana min hrilh thawi ho kha an lo thleng sang hle tih ka hrethiam ta a ni. Puitu ngaiin inthen duh lo ve ve chungin an lo inrem lo tihna a nih chu.
Paula’n Ephesi khua mite hnena lehkha a thawn 5:22-26 inkar thu hmangin Marriage counseling lam hawi ka sawi a ni. Duh thaw takin aw rawl ring leng lawngin ka sermon a, thlanin min bual huh dap hnma hial. Ka sawi zo chu a nupuiin kawl tawng a lo thiam fum fe lo hi niin an han hrilhfiah leh hnuhnawh, buaithlak thei sin aw. Fuihna leh inrem lehna tur kawng zawngin kan sawi nasa. A tawpah in ngaidam tawn tur leh ngaihdam in dil tawn turin ka ti ta tawp mai a ni. An pa zawk chu kan sawm hmasa a, tap chungin Haleluiah a pek mai bakah a tawngtai chhunzawm chu ka mu chur chur thei. Thlarau thianghlim kan zingah a cheng tih ka chiang a ni. An nu pawn ngaihdam dilna thu leh hmangaih taka hun hman dun zel a duh thu a rawn sawi chhunzawm ve leh phei chu Mittui a tla tep a ni.
In kutsuih chungin an thingthi a, Pathian hnenah hlan tharna kan nei leh a, inremna a thleng chu a ni mai. Pathianin assignment min pek hi a hrawl tan riau. Eng ang assignment nge min pek leh dawn ka hre lo. Kohhran committee leh PWS committee te kan thlang nghal a. Mahniin kan in hlan nghal vek bawk. Zan lam inkhawm (Sunday night) vawikhatna pawh kan hmang thei a. Zantin hmang turin kan rel a ni. Engpawhnise vawiin hi history ropui tak a la ni ngei dawn.
Kabaw Tlangval 